विहिरीचे गाणे 

         हळु हळु दिनमणि हा उदयाचलिं आला
         फुलवाया जणुं माझ्या भाग्य पंकजाला
                        येइल तो शेतकरी
                        लाविल मग मोट वरी
        नेइल मम जीवनांश पिकविण्या पिकाला
                        येतिलही किति गृहिणी
                        नेतिल जल घट भरुनी
         निज चरणीं वाहुनिया देहिं वलयमाला
                         घेइल कुणि वरुनि उडी
                         देइल कुणि पोटिं दडी
         लाडानें झटति मुलें जेविं माउलीला
                         कलशातें वसनातें
                         क्षाळतील जन येथे
        भाग्य थोर ! -- करुं शकते विमल मलिनतेला
                        सकलांच्या व्यापारी
                        ही सरेल नीळ दुरी
        प्रतिबिंबें आणतील भरति वैभवाला
      हळु हळु दिनमणि हा उदयाचलिं आला.
                                                                    - कवी यशवंत