मोगर्‍याचा हार 

मुलगा - हा हार शुभ्र किति आई |
             किति कोमल सुंदर पाहीं || क्षणभरी ||
             किति वास मधुर या येई |
             मम चित्त ओढुनी घेई || बघ तरी ||
             कशिं फुलें डवरलीं असतीं |
             किति अलंकार त्यापुढती || बहुपरी ||
             भूवरी | जन्म घे तरी | वास जनशिरीं |
             कसा हा मिळवी |
             जनमनें कशानें वळवी || वद तरी ||१||

   आई - मधुवासें प्रिय हा सकलां |
             स्वगुणांनी तू हो बाळा || त्यापरी ||
             हा धवलत्वें सुंदरसा |
             चरित्र्यें शोभे तसा || तूं तरी ||
             हा दिपवि जसा नगभारा |
             तेज तूं लोपविं धीरां || त्यापरी ||
             यापरी | वागशिल जरी | सकल जन तरी |
             तुजसि मम तनया |
             शिरिं धरितिल हारासम या || कधिं तरी ||                  

कवी:- गोविंदाग्रज